منتدى كليه التربيه الرياضيه ( الغير رسمى)
Would you like to react to this message? Create an account in a few clicks or log in to continue.

You are not connected. Please login or register

شويه نكت فى الجون ( إضحك من قلبك )

3 posters

Go down  Message [Page 1 of 1]

ahmed2

ahmed2
خلاص بقيت في الفورمة
خلاص بقيت في الفورمة

كل يوم واحد غلبان اوي يدخل البنك ويقوم حاطط مليووون جنيه في حسابه
كل يوم مليون جنيه ..
كل يوم علي كده
الموظفين استغربوا
وفي يوم من الأيام قال لهم المدير إذا جاء نادوه أكيد هو غني ولازم نكسبه زيادة
لما جيه الراجل ودخل البنك دخلوه الموظفين على المدير
قاله المدير انت بتشتغل ايه .. ولا فين ؟..قال: عاطل ماليش شغل
قاله المدير : امال منين بتجيب الفلوس دى؟
قال: أنا براهن الناس على اي حاجه ويكون الرهان علي مليوون جنيه وأكسب.
قاله المدير : انت كذاب احسن لك قول لي الصراحه...
قال الراجل: خلاص تراهن أبوس عيني على مليون جنيه ؟
قال المدير أتحداك...
قام الراجل وفك عينه وباسها ورجعها
(عينه كانت صناعيه تركيب)
قاله المدير ازااااى ؟
قال الراجل :تتحدانى أعض ودنى على مليون جنيه ؟
قال المدير أراهن....
قام الراجل وطلع سنانه وعض ودنه ورجعها
سنانه بردو تركيب
أداه المدير 2 مليون جنيه ومشى الراجل
من الصبح لما دخل الراجل للبنك نادوه الموظفين ودخلوه على المدير
قاله المدير يابن الحلال كفايه كدة ورجعلي فلوسي
قال الراجل: خلاص أنا بتحداك على حاجه إذا أنت فزت أديك فلوسك الـ 2 مليون ...ومعاهم زيهم ..
وإذا أنا فزت تدينى مليون جنيه
قاله المدير تراهن على أيه ؟
قال الراجل: تتحداني أن لون فانلتك الداخليه أزرق
قال المدير وهو فرحان : لا مش أزرق
قال الراجل.... لا أزرق
قال المدير... لا مش أزرق
قال الراجل : خلاص اشوف الفانله واتأكد
قلع المدير الجاكيت و القميص ورحل قالع الفانله وموريها للراجل وقايل له : اهي .. مش قلت لك مش زرقه ؟؟؟
التفت الراجل لقي الموظفين لقاهم قاعدين بيتفرجوا عليه
ولقي الراجل راح خد من كل واحد مليون جنيه وقال لهم
مش قولتلكوا هاخليه يقلع القميص ؟؟؟؟؟

********************************************************

المعلم يسأل الطالب :
غير صيغة الفعل من المضارع للماضي .
الطالب : خلاص الماضي ودعته = محيت ذكراه من بالي
انا من باعني بعته = ولا دربه يجي دربي
المعلم : إنت فاكر دمك خفيف ، إنت عاوز تعلمني الهيافة بتاعتك ؟
الطالب : حاجات علمتهالك ... وحاجات نولتهالك ... وحاجات عيشتهالك .. أيام مكنتي معايا .. بريئة بتحلمي !
المعلم: لك يخرب بيتك أنتي فاكرني بنت يا مسطول ، اعتذر و توب قبل ما ارميك من الشباك
الطالب : وانا كل ما قول التوبة يا بوي ترميني المقادير ياعين !
المعلم : انا رايح اجيب الناظر يتفاهم معاك ، وحتشوف لما يجي حيعمل فيك ايه
الطالب : الغضب الساطع آت - من كل مكان آت !
المعلم : هزر زي ما انت عاوز وحنشوف حتعمل معاك ايه !
حضر الناظر مع المعلم وسال الناظر الطالب :
الناظر : إنت إيه حكايتك مع المدرس ؟
الطالب : توادعنا انا واياه = لكن ما توادعنا .
الناظر : انت يا ابني بالع راديو والا شريط .. مالك كده على بعضك مز يكا ! انت ما نمتش امبارح ؟
الطالب : نسيت النوم واحلامه = نسيت لياليه وايامه !
الناظر : إطلع بره وخليني اشوف ابوك جاي يا مش متربي
الطالب وهو خارج من الصف : يجيلك يوم تندم على ما سويت = واقول منك لله يكفي انا مليت !
المعلم للناظر : الطلاب اللي زي دول بتعمل معاهم إيه ؟
الناظر : أطبطب......... وادلع

********************************************************

اتنين متجوزين من عشرين سنة .. قرروا يروحوا يصيفوا ع البحر بنفس الفندق اللى قضوا فيه شهر العسل زمان
لكن الزوجة كانت مشغولة فاتفقت مع زوجها على إنه يسافر لوحده و هى ح
تلحقه بعد يومين وصل الزوج ع الفندق و دخل الغرفة فوجد كمبيوتر بالغرفة و متوصل بكابل
الانترنت فقال يبعت ايميل لزوجته يطمئنها فيه على أحواله
بعد ماكتب الرسالة و هو بيكتب عنوان البريد الالكترونى لزوجته أخطأ فى
كتابة حرف فى العنوان
و بالطبع راح الايميل لشخص تانى تصادف إنه كان لأرملة لسة راجعة من
مراسم دفن زوجها اللى توفاه الله بنفس اليوم .. الست الأرملة فتحت
الكمبيوتر بتاعها لتقرأ ايميلات التعازى وقعت ع الأرض مغمى عليها
بلحظة دخول ابنها اللى حاول يسعفها بكل الطرق و لم يفلح فى إفاقتها
نظر الابن إلى كمبيوتر والدته و قرأ الرسالة التالية
زوجتى العزيزة .. وصلت بخير .. و يمكن تتفاجئى لأنك ح تعرفى أخبارى
عن طريق الانترنت لأنه دلوقتى بقى فيه كمبيوتر عندهم و يقدر الواحد
يبعت أخباره لأهله و أحبابه يوم بيوم
أنا بقى لى ساعة واصل و تأكدت إنهم جهزوا المكان و كل شىء و مش باقى غير وصولك لعندى هنا بعد يومين إشتقت لك كتير و مشتاق أشوفك و باتمنى تكون رحلة سريعة زى رحلتى
ملاحظة : مش ضرورى تجيبى ملابس كتيرة معاكى لأن هنا الحر شديد قوى قوى....

يعنى جهنم.

*******************************************************

مرة واحد ماشى فى الشارع فقابل واحد تانى شكله مش على بعضه ومستعجل أوى وبيقول:

لو سمحت من فضلك قلعنى الجاكتة

فالأولانى قال له:نعم ؟

فالتانى قال: قلعنى الجاكتة بسرعة

حاضر....حاضر وراح مقلعه الجاكتة

لو سمحت بقه قلعنى الكرافتة

ايه؟

الكرافتة.....الكرافتة بسرعة

حاضر حاضر وراح مقلعه الكرافتة وهو مستغرب اوى من الراجل الغريب ده:ها ياسيدى أى خدمة تانية

آه .معلش فكلى زراير القميص

لااااا دانت زّودتها أوى ..كده تاخد برد يقلب بنزلة شعبية حادة تاخد أجلك

من فضلك فكها ....بسرعة أرجوك

افففففففف... وأدى زراير القميص خلاص فكتها... دا كان يوم ايه المهبب ده، ها أى أوامر تانية؟

أيوه قلعنى بقه القميص

ياسيدى عيب مايصحش كده، دا احنا فى الشارع خللى عندك دم ..... لا حول ولا قوة الا بالله

أرجوك أرجوك بسرعة.....مفيش وقت

دى وقعت ايه المهببة دى، أنا كان ايه اللى جابنى من الشارع ده... وادى القميص..هااااا..ايه تانى

ارسملى على ظهرى خطوط بالطول وخطوط بالعرض

حسبى الله ونعم الوكيل...انت مجنون ياراجل أنت؟؟؟؟

من فضلك....أرجوك

رسمتلك زفت بالطول وزفت بالعرض

رقملى بقه المربعات للى اتكونت على ظهرى بالارقام من 1 الى 40

ياصبر أيوووووووووب .. بقه أنت معطلنى كل ده علشان تلعبنى سيجا على قفاك؟؟؟

بسرعة لوسمحت....ارجوك رقمهم ....من فضلك مش قادر

أدينى رقمتهم

لو سمحت بقى أهرشلى فى المربع رقم 33

******************************************************

* امتحان مسسسخرة *

السؤال الأول: التعبير

اكتب ما لايقل عن 650 سطر فى أحد الموضوعات التالية :

لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 7000 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
ــــــــــــــــــــــــــــــــــــــــــــــــــ ـــــــ
السؤال الثانى: القصة :

من قصة " وعهد الله ما انت داخل الانتخابات" .. اقرأ القطعة وأجب عن الآتى:

(ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟)

الأسئلة:

1-ما هى اللحمة؟ أو على الأقل حدد أقرب معنى خيالى لها
2-مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت
3-لماذ ضربه الرجل بالجزمة وليس بالعصى مثلا؟؟
(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى) اختر
4-حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــ ــــــــــ
السؤال الثالث القراءة

من موضوع ( الزعيم..والفنان.. والقدوة) اقرأ القطعة وأجب

(وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة)

1-دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
(أكيد معزوم – طبيعى معزوم – وربنا معزوم).. اختر على أن تضع إيدك على المصحف وانت بتحلف للمراقب بتاع اللجنة
ــــــــــــــــــــــــــــــــــــــــــــــــــ ــــــــــــ
السؤال الرابع النصوص

أجب عن أحد النصين الآتيين

من نص ( ماشربتش من نيلها)..اقرأ ثم أجب

(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)

1-بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
(المسيسبى - الأمازون – يونج يانج)
2-هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه
3-أكمل الأبيات إلى آخر كحكة فى الكليب
4-قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى
ـــــــــــــــــــــــــــــــــــــــــــــــــ ـــــــ
من نص (حين ميسرة)..أجب عن الآتى

1-اذكر اسم مصيبة واحدة محصلتش فى النص الأسود ده
2-وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى
3-فى نصى ويجا وخيانة مشروعة وضح خالد يوسف هستيريا الــــ فى الطبقات الغنية.. وفى نص حين ميسرة وضح خالد يوسف هستيريا الجنس فى الطبقات الفقيرة..عشان خطرى.. اذكر مع كامل البيانات أماكن هذه الهستيريا فى المعادى
4-سبب وجود الشرطة كل خمس دقائق فى النص
(موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص) اختر
ـــــــــــــــــــــــــــــــــــــــــــــــــ ـــــــــ
السؤال الخامس النحو

أعرب ما تحته خط.. لو مالقيتش القطعة أصلا ..اتصرف

ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا يابني آدم

كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده

فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ

السؤال السادس الخط

كوز المحبة انخرم..طرطش على كمى..ياحبيبى بطل جفا وارحم عذاب امى

اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل

*******************************************************

عندما كادت هيئة المحكمة أن تنطق بحكم الإعدام على
قاتل زوجته والتي لم يتم العثور على جثتها رغم توافر
كل الأدلة التي تدين الزوج - .. وقف محامى الدفاع
يتعلق بأى قشة لينقذ موكله ...

ثم قال للقاضي : ليصدر حكماً بالإعدام على قاتل..
... لابد من أن يتوافر لهيئة المحكمة يقين لا يقبل
الشك بأن المتهم قد قتل الضحية ..
والآن .. سيدخل من باب المحكمة ... دليل قوي على براءة موكلي
وعلى أن زوجته حية ترزق !!...

وفتح باب المحكمة واتجهت أنظار كل من في القاعة إلى
الباب ...
وبعد لحظات من الصمت والترقب ... لم يدخل
أحد من الباب ...

وهنا قال المحامى ..
الكل كان ينتظر دخول القتيلة !!
وهذا يؤكد أنه ليس لديكم قناعة مائة بالمائة بأن موكلي
قتل زوجته !!!

وهنا هاجت القاعة إعجاباً بذكاء المحامى .. و تداول
القضاة الموقف

.... و جاء الحكم المفاجأة ....

حكم بالإعدام !!

لتوافر يقين لا يقبل الشك بأن الرجل قتل زوجته !!!

وبعد الحكم تساءل الناس كيف يصدر مثل هذا الحكم ...
فرد القاضي ببساطة...
عندما أوحى المحامى لنا جميعاً
بأن الزوجة لم تقتل ومازالت حية ...
توجهت أنظارنا جميعاً إلى الباب منتظرين دخولها

إلا شخصاً واحداً في القاعة

إنه الزوج المتهم !!!

لأنه يعلم جيداً أن زوجته قتلت ... وأن الموتى لا يسيرون !

****************************************************

اليكم مقارنه بين البنت والولد
والمقارنات انما ايه تتجنن ..

نبداء..

المقارنة الاولى

الولد والبنت
-بالنسبة للفتاة لو مر من امامها ولد وكانت معجبة به فانها تلقي عليه نصف نظرة من تحت لتحت حتى لا يفضح امرها
- أما بالنسبة للولد يا لطيف : يدير عنقه 360 درجة كالصقر وتجد نصف سكان الحي قد كشفوا امره من خلال تلك النظرة البلهاء

المقارنة الثانية

حين نجد قط غير مرغوب به داخل البيت
- بالنسبة للفتاة فانها تقترب من القط بهدوء وتمسكه برفق ثم تطعمه وبعد أن ينتهي تتوجه الى الباب على مهلها وتحطو برة بكل ادب ثم تغني له أغنية آسفة لأصالة نصري والسبب أن والدها لايحب سماع المواء اثناء نومه لذلك تعد القط أنها ستدخله غدا والمسكين ينتظر الغد بفارغ الصبر ثم تغلق الباب وتذهب للنوم
- اما الولد فلا يصدق نفسه حين يرى قطا داخل البيت . في تلك اللحظة يتخيل نفسه زين الدين زيدان يسدد ضربة حرة فتجد القط المسكين مسدد به في الزاوية اليسرى للنافذة وهو طائر تسمعه يقول للولد (روح ربنا ينتقم منك ) قبل أن يسقط في أقرب زبالة

المقارنة الثالثة

* حين نجد بطل أفلام الرعب لدى الفتيات ( صرصارا )
- حين تجد فتاة صرصارا بالليل تصرخ كأنها بتعزف السمفونية الأخيرة لبتهوفن
ثم تستجمع شجاعتها وتحضر المبيد وترشه وهي تقول حتموت يعني حتموت والله لأموتك والصرصار بيضحك على خفة دمها لحد مينزل عليه أبوها بالقبقاب
- أما بالنسبة لأخينا فانه حين يجد صرصار ينتابه جنون العظمة فيعتقد انه هتلر ويضحك ضحكة حتى تبرز جميع ضروسه المخفية ثم يمسك الصرصار ويبدأ بعملية التعذيب فينزع له الرجل الاولى ويسأله : بابا فين
الرجل الثانية : ماما فين
الثالثة : اخواتك فين
الرابعة : ساكن فين
الى ان تنتهي أرجل الصرصار
ويتركه حيا حتى يكون عبرة لكل صرصار حاول أن يتجرأ ويظهر له وهو موجود

المقارنه الاخيره

* خناقة بين اثنين من بني جنسهم
- بالنسبة لفتاتين بيتخانقوا أنت لا تسمع سوى :
انت حمارة
لأ انت للي ستين حمارة
الزمي حدودك انت للي ستمية وستين حمارة
والله انت جريئة أوي ده انت للي ستة ألاف وستمية وستين حمارة
الى ان يصلوا للعدد 66666666666666666666 من الحمير
- اما بالنسبة للصراع بين الجبابرة ( الرجالة يعني )
فكل الكلام .. تحت الحزام

****************************************************

كفاية عليكوا كدا و حنكمل فى موضوع تانى

ahmed2

ahmed2
خلاص بقيت في الفورمة
خلاص بقيت في الفورمة

إيه مفيش حد عجبتوا النكت خالص

كابوكى

كابوكى
يا صباح المستويات العالية
يا صباح المستويات العالية

الله ينور عليك يا فكرونه

http://www.manutd.com

ahmed2

ahmed2
خلاص بقيت في الفورمة
خلاص بقيت في الفورمة

وعليك يا كابوكى

احمد عبد المطلب

احمد عبد المطلب
يا صباح المستويات العالية
يا صباح المستويات العالية

الله ينور

ahmed2

ahmed2
خلاص بقيت في الفورمة
خلاص بقيت في الفورمة

وعليك يا أحمد

Back to top  Message [Page 1 of 1]

Similar topics

-

Permissions in this forum:
You cannot reply to topics in this forum